२०८३, कार्तिक ४ गते
.png){kind=small}
लुम्बिनी चिन्तन
भैरहवा मंसिर २२
सिद्धार्थनगर उधोग बाणिज्य संघको आयोजनामा सुक्रवार देखी भैरहवामा हुन लागेको लुम्बिनी राष्ट्रिय महोत्सव–२०७९ को तयारी पूरा भएको छ ।
महोत्सवको गृहमन्त्री बालकृष्ण खांणले उद्धघाटन गर्नु हुने आयोजकले जानकारी दिएको छ । मेलाको सम्पूर्ण तयारी पूरा भएको र भव्यरुपमा उद्घाटन गरिने महोत्सव प्रचार प्रसार समिती संयोजक कृष्ण प्रसाद घिमिरेले जानकारी दिए ।
संघका अध्यक्ष भीष्मप्रसाद न्यौपानेले कोरोना महामारीले सिथिल बनेको अवस्थामा महोत्सवले केही न केही बजारलाई चलायमान बनाउने बताएका छन् ।
‘मेला भर्न आउने दर्शक धेरथोर सामान खरिद गर्नुहुन्छ, यसले बजारमा पैसा आउँछ’, मेला मूल आयोजक समिति संयोजक समेत रहेका न्यौपानेले भने, ‘मेलामा करिब ३ लाख दर्शकले अवलोकन गर्ने भएकाले बजारलाई गुल्जार बनाउन टेवा पुग्ने विश्वास हाम्रो छ ।’ मंसिर २३ गते शुक्रबारदेखि महोत्सव सुरु हुनेछ ।
कृषि, पर्यटन, औद्योगिक एवं व्यापार र कलासंस्कृतिको संरक्षण र प्रद्र्धन गर्ने उद्देश्यले संघले महोत्सव गर्न लागेको हो । मेलामा कृषि, खाद्यान्न, लत्ताकपडा, घरेलु तथा साना उद्योगको उत्पादन, पर्यटन, अटोमोबाइल्ससँग सम्बन्धित स्टलहरु रहनेछन् । यस्तै, भ्वाइस अफ भैरहवा, कुस्ती, ब्याडमिन्टन, दुनाटपरी र बत्ती काट्ने प्रतिस्पर्धा हुँदैछ । यसका साथै महोत्सवमा राष्ट्रिय तथा स्थानीय कलाकारको सांगितिक प्रस्तुतीका साथै बालउद्यान पनि रहने संघका महासचिव विजय पाण्डेले जानकारी दिए ।
अहिले मंच निर्माण, सचिवालय, प्रवेशद्वार, स्टल निर्माण लगायतका काम सकिएको र केही बाँकी काम उद्घाटन पहिले नै सम्पन्न गरिने बताए । २ सय ५० स्टल रहने महोत्सवमा अपेक्षा भन्दा बढी स्टल दर्ता भएको पाण्डेले दावी गरे । भैरहवास्थित अंचलपुरमा पुस ४ गतेसम्म संचालन हुने महोत्सवमा जेष्ठ नागरिक तथा अशक्तलाई निःशुल्क प्रवेशको व्यवस्था गरिएको छ ।
यस्तै, १ सय ५० रुपैयाँमा पाँच जनासम्मलाई मेलास्थल प्रवेशका लागि पारिवारिक टिकटको पनि व्यवस्था गरिएको संघका बरिष्ठ उपाध्यक्ष ठाकुरकुमार श्रेष्ठले बताए । उद्धघाटनका दिन भैरहवाको देवकोटाचोकबाट र्याली निकालेर मेलास्थल पुग्ने आयोजकको भनाई छ । र्यालीमा उत्कृष्टलाई पुरस्कृतसमेत गरिने संघका सदस्य तथा प्रचार–प्रसार समिति संयोजक कृष्णप्रसाद घिमिरेले जानकारी दिए ।
